Fondasiyo Ntarama ni umuryango udaharanira
inyungu wavutse mu mwaka w'ibihumbi bibiri na gatatu (2003), ushinzwe
n'abanyarwanda bacitse ku icumu n’abandi barokotse itsembabwoko ryakorewe
abatutsi mu w'i 1994.
Kubera iki Ntarama?
Ntarama
ni kiliziya nto iri ku karenge gato ko mu karere ka Bugesera, kaguyemo
inzirakarengane zirenga ibihumbi bitanu. Ni rumwe mu rwibutso rw'itsembabwoko
ryo muw'i 1994 mu rwego rw'igihugu.
Uduhanga
tutabarika, amagufa, imyenda n'ibindi bisigara by'izo nzirakarengane
byuzuye iyahoze ari kiliziya ya Ntarama byerekana umubare utabarika
w'abahaguye.
Icyo
Fondasiyo Ntarama igamije ni ugukusanya no kubika inyandiko z'ubuhamya bw'abacitse ku icumu
aho baba bari hose. Iryo shyinguranyandiko
rizatuma ababyiruka ndetse n'abatarabibayemo bamenya by'imvaho amahano
ndengakamere yakorewe abanyarwanda muri uwo mwaka, ibitekerezo byayabimburiye,
n'imibabaro itavugika yayakurikiye.
Kugirango igere kuri
izo nshingano, Fondasiyo Ntarama yigabanyijemo amakomisiyo azakora imirimo
inyuranye yerekeranye no gusesengura
amateka y'u Rwanda ndetse n'ibitekerezo by'abanyapolitiki
byaba byararoshye igihugu muri iryo tsembabwoko.
Fondasiyo Ntarama yafunguye
kandi Site internet abacitse ku icumu bashobora kwandikaho ibyerekeranye n' imibereho yabo
mu gihe cy'intambara, amazina yabo, amafoto cyangwa ikindi cyose bakwifuza
gutangariza abasomyi b'iyo site.
Fondasiyo Ntarama izereka
amahanga uturere tunyuranye
twakorewemo ayo mahano, amazina
n'imyirondoro by'abayaguyemo, igihe byakorewe n'uburyo bunyuranye
bwagiye bukoreshwa . Bityo Fondasiyo Ntarama ikaba yizeye gutanga
inkunga yayo mu kunyomoza abakomeje guhakana
no gupfobya itsembabwoko.